Негізгі мазмұнға өту Негізгі шарлау мәзіріне өту Сайттың төменгі деректемесіне өтіңіз
Абай атындағы ҚазҰПУ Хабаршысы. Экономика сериясы

Журнал саясаты

ЖУРНАЛДЫҢ РЕДАКЦИЯЛЫҚ САЯСАТЫ

«Абай атындағы ҚазҰПУ Хабаршысы, «Экономика» сериясы»

 

Абай атындағы ҚазҰПУ Хабаршысы, «Экономика » сериясы  ғылыми журналы 2003 жылдан бастап жарық көріп келеді және жылына 4 рет белгіленген мерзімдерде шығарылады: №1 шығарылым — ағымдағы жылдың 30 наурызына дейін, №2 — 30 маусымға дейін, №3 — 30 қыркүйекке дейін және №4 — 30 желтоқсанға дейін.

Жарияланым тілдері: қазақ, орыс және ағылшын тілдері.

Тақырыптық бағыты: экономикалық ғылымның теориясы мен әдіснамасы мәселелерін, әлемдік экономиканың интеграциясы мен жаһандануының проблемаларын, сондай-ақ экономикалық білім беру мәселелерін қамту.

«Абай атындағы ҚазҰПУ Хабаршысы, «Экономика» сериясы ғылыми журналы экономика және сабақтас бағыттар саласындағы бірегей теориялық, әдіснамалық және эмпирикалық зерттеулердің нәтижелерін жариялауға бағытталған рецензияланатын ғылыми басылым болып табылады.  

Журналдың мақсаты – экономикалық ғылымның өзекті мәселелері бойынша ғылыми пікірталасты дамыту, әлеуметтік-экономикалық үдерістерді зерттеу нәтижелерін ұсыну және қазақстандық әрі халықаралық академиялық қауымдастықтар арасында ғылыми білім алмасуға ықпал ету. Журналда ерекше назар  ғылыми жаңалығы бар, әдіснамасы негізделген, нәтижелері шынайы әрі теориялық немесе практикалық маңызы бар зерттеулерге  аударылады.

Журналдың негізгі тақырыптық бағыттары: экономикалық теория және экономикалық зерттеу әдіснамасы; макроэкономика және микроэкономика; аймақтық экономика; экономиканы мемлекеттік реттеу;  қаржы және қаржы нарықтары; менеджмент және кәсіпкерлік; маркетинг; бухгалтерлік есеп және аудит; халықаралық экономика; білім беру экономикасы; цифрлық экономика және инновациялар; тұрақты даму және жасыл экономика; еңбек нарығы және адами капитал.

Қолжазбаларды ұсыну және қарау шарттары

Жариялауға  журналдың мақсаты мен тақырыптық бағыттарына сәйкес келетін, бұрын жарияланбаған қазақ, орыс немесе ағылшын тілдерінде жазылған, түпнұсқа қолжазбалар қабылданады. Журналға ұсынылған қолжазба бір мезгілде басқа ғылыми басылымда қаралуда болмауы тиіс.

Ұсынылған зерттеулер ғылыми тұрғыдан негізделген нәтижелерді қамтуы, академиялық адалдық қағидаттары мен жарияланым этикасының талаптарына сәйкес келуі тиіс. Авторлар ұсынылған деректер мен зерттеу нәтижелерінің дұрыстығына, дәйексөздерді және библиографиялық мәліметтерді дұрыс рәсімдеуге жауапты. Қолжазба мақала мен оның авторларының барлық метадеректерін көрсете отырып, корреспонденция үшін жауапты автор тарапынан электрондық платформа арқылы жүктелуі тиіс. Бір мақаладағы авторлардың саны 5 адамнан аспауы керек.

Ұсынылатын қолжазбалар журналдың құрылымына, мазмұнына және рәсімделуіне қойылатын белгіленген талаптарға сәйкес келуі тиіс. Рецензиялауға жіберер алдында редакция қолжазбаның журнал тақырыбына, белгіленген ресми талаптарға, академиялық адалдық қағидаттарына және жарияланым этикасына сәйкестігін бастапқы тексеруден өткізеді.

Редакция жариялауға қабылданған қолжазбаның мазмұнына, ғылыми нәтижелері мен қорытындыларына өзгеріс енгізбейтін техникалық, орфографиялық және стилистикалық редакциялауды жүзеге асыруға құқылы. Қолжазбаның ғылыми мазмұнына қатысты өзгерістер корреспонденция үшін жауапты автормен келісіледі. Қолжазба бұрын жарияланбаған болуы және мәтіннің түпнұсқалылық деңгейі кемінде 75% құрауы тиіс. Жасанды интеллект құралдарын пайдаланудың рұқсат етілетін көлемі 20%-дан аспауы керек. Жасанды интеллект құралдарын пайдаланудың рұқсат етілетін түрлеріне деректерді өңдеу және талдау, ақпаратты іздеу және жүйелеу, сондай-ақ ғылыми мазмұнның мәнін өзгертпей мәтінді редакциялау жатады.

 Барлық ғылыми мақалалар редакциялық кеңес құрамына кірмейтін тәуелсіз рецензент ғалымдар немесе мамандар тарапынан міндетті түрде қос жасырын рецензиялаудан өтеді. Журналдың редакциялық алқасы автордан/авторлардан келіп түскен қолжазбаларды қарайды, рецензиялауды ұйымдастырады және оларды жариялау немесе жариялаудан бас тарту туралы шешім қабылдайды. Редакциялық алқа мақаланы редакциялық-баспагерлік үдерістің кез келген кезеңінде қарау нәтижелеріне сәйкес қабылдау немесе жариялаудан бас тарту құқығын өзіне қалдырады. Журналда жариялауға мақұлданған қолжазбаның авторы (авторлары) бекітілген жариялау құнының прейскурантына сәйкес жарияланым ақысын төлеуге міндетті.

Көшіріп  алу және плагиат

Абай атындағы ҚазҰПУ Хабаршысы, «Экономика» сериясы журналының редакциясына келіп түскен барлық мақалалар плагиатқа тексеру жүйесі арқылы көшіріп алынған мәтіннің бар-жоқтығын анықтау үшін «Антиплагиат» (лицензия) жүйесінде  тексерістен өтеді. Тек түпнұсқа қолжазбалар және/немесе «Антиплагиат» жүйесі арқылы жүргізілген тексеру нәтижесінде түпнұсқалық көрсеткіші 75%-дан жоғары болған қолжазбалар одан әрі рецензиялауға жіберіледі. Мақала журналдың белгіленген талаптарына сәйкес келмеген жағдайда, қолжазба авторға қажетті түзетулер  енгізу үшін қайтарылады. Түзетілген қолжазба редакциялық алқаның қайта қарауына журналдың электрондық платформасы арқылы ұсынылады.

 

Рецензиялау

Барлық мақалалар екі бірдей жасырын рецензиялаудан өтеді. Журнал редакциясына келіп түскен және ресми талаптарға, рәсімдеу талаптарына, сондай-ақ плагиатты тексеру жүйесі арқылы анықталған түпнұсқалық көрсеткішіне сәйкес келетін қолжазбалар міндетті түрде одан әрі рецензиялауға жіберіледі. Рецензиялау құпия түрде жүргізіледі: мақала қолжазбасы авторлар туралы деректер көрсетілмей, журналдың электрондық платформасы арқылы тәуелсіз рецензенттердің қарауына жіберіледі. Қолжазба дұрыс рәсімделмеген немесе журнал талаптарына сәйкес келмеген жағдайда, мақала авторға қайтарылады. Рецензиялау және техникалық сараптама нәтижелеріне сәйкес редакциялық алқа мақаланы жариялаудан бас тарту, авторға пысықтау үшін қайтару немесе жариялауға қабылдау туралы шешім қабылдайды.

 

Еркін  қол жеткізу саясаты және мұрағат

Абай атындағы ҚазҰПУ Хабаршысы, «Экономика» сериясы журналы ресми веб-сайт арқылы журнал мазмұнына ашық қолжетімділікті қамтамасыз етеді. Жариялауға қабылданған барлық ғылыми мақалалар журналдың ресми сайтында орналастырылады. Журналдың веб-сайтында авторлар мен оқырмандар үшін журналдың қызметіне қатысты қажетті ақпараттар ұсынылған: жариялау шарттары, қолжазбаларды журналға ұсыну және рәсімдеу талаптары, журналды қалыптастыру және қолжазбаларды рецензиялау тәртібі, жарияланым этикасы, редакциялық алқа құрамы, ғылыми редактор мен жауапты хатшының байланыс деректері қамтылған. Сонымен қатар, Абай атындағы ҚазҰПУ Хабаршысы «Экономика» сериясы журналының барлық баспа нұсқалары университет кітапханасында қолжетімді. 

Авторлар өз қолжазбаларына қатысты авторлық құқықтарын сақтайды, сонымен бірге кез келген тұлғаға аталған жұмыстарды еркін жүктеп алуға, пайдалануға, қайта теруге, өңдеуге, таратуға немесе көшіруге рұқсат береді. Бұл ретте жұмыстың авторлығын міндетті түрде көрсету және оның осы журналда жарияланған бірегей нұсқасына сілтеме жасау талап етіледі.

 

Жариялау  этикасы

Журналдың редакциялық алқасы өз қызметінде ғылыми этика қағидаттарын басшылыққа алады. Журнал редакциясы қабылданған этикалық нормаларды қатаң сақтауға және олардың бұзылуына жол бермеуге ұмтылады. Журналда ғылыми материалдарды дайындау және жариялау үдерісінің барлық қатысушылары — авторлар, рецензенттер және редакциялық алқа мүшелері — ҚазҰПУ журналдарында белгіленген жарияланым этикасы талаптарын сақтауға міндетті.

Журнал редакторлары ұсынылған қолжазбаларды тек олардың ғылыми маңыздылығы, келтірілген мәліметтердің дұрыстығы мен нақтылығы, сондай-ақ алынған қорытындылардың негізділігі тұрғысынан бағалауды жүзеге асырады. Редакторлар авторлардың дербес деректерінің құпиялылығын қамтамасыз етуге міндетті.

Редакциялық алқа мүшелері жарияланым этикасының белгіленген нормаларын сақтауға және журналдың редакциялық саясатында көзделген талаптарды орындауға міндетті. Олар қызмет барысында алынған ақпараттың құпиялылығын қамтамасыз етуге, сондай-ақ авторлардың жарияланбаған материалдары мен зерттеу нәтижелерін тиісті рұқсатсыз өздерінің ғылыми зерттеулерінде пайдаланбауға тиіс.

Редакциялық алқа мүшелері ұсынылған қолжазбаларға тәуелсіз рецензия жүргізу мақсатында әртүрлі ғылыми салалар бойынша білікті мамандарды тартуға құқылы.

  Рецензенттер қолжазбаларға белгіленген мерзімдерде сараптамалық бағалау жүргізуге, алынған ақпараттың құпиялылығын сақтауға, сондай-ақ ғылыми жұмыстың объективті, дәлелді және негізделген бағасын ұсынуға міндетті.

Авторлар ұсынылған зерттеу нәтижелерінің дұрыстығы мен шынайылығына жауапты. Қолжазба зерттеу нәтижелерін негіздеу үшін жеткілікті көлемдегі ақпаратты қамтуы тиіс, ал мақала мәтінінің бірегейлік деңгейі кемінде 75 % болуы қажет. Басқа зерттеушілердің еңбектеріндегі ережелер, нәтижелер немесе дәйексөздер пайдаланылған жағдайда, автор тиісті библиографиялық сілтемелерді дұрыс рәсімдеуге және академиялық адалдық қағидаттарын сақтауға міндетті.

 

Мүдделер қақтығысын және әдепке қайшы мінез-құлықты анықтау шаралары

Авторлар, рецензенттер және редакциялық алқа мүшелері қолжазбаны ұсыну, бағалау немесе оған қатысты шешім қабылдау үдерісінің объективтілігіне әсер етуі мүмкін әлеуетті немесе нақты мүдделер қақтығысының бар екендігі туралы хабарлауға міндетті. Мүдделер қақтығысы редакциялық үдеріске қатысушылардың тәуелсіздігіне күмән келтіруі мүмкін қаржылық, кәсіби, институционалдық немесе өзге де жағдайларға байланысты болуы мүмкін. Мүдделер қақтығысы болған жағдайда рецензент немесе редакциялық алқа мүшесі тиісті қолжазбаны қарау үдерісіне, рецензенттерді іріктеуге және редакциялық шешім қабылдауға қатыспауы тиіс.

Журналдың бас редакторы, ғылыми редакторы немесе редакциялық алқа мүшелері автор немесе қосалқы автор болып табылатын қолжазбалар белгіленген рецензиялау тәртібін сақтай отырып, жалпы негізде қарастырылады. Мұндай қолжазбаның авторы оны редакциялық қарау үдерісіне, рецензенттерді таңдауға және жариялау туралы шешім қабылдауға қатыспайды. Бұл жағдайда қолжазбаны қарау мүдделер қақтығысы жоқ басқа редакциялық алқа мүшесіне тапсырылады.

 

Жарияланған материалдарға түзетулер енгізу және оларды кері қайтарып алу

Жарияланған ғылыми еңбекте оның нәтижелерінің дұрыстығына, ғылыми түсіндірілуіне немесе академиялық адалдық қағидаттарына әсер  етуі мүмкін қателер мен бұзушылықтар анықталған жағдайда, редакция тиісті түзетулер енгізу жөнінде қажетті шараларды қабылдайды. Зерттеудің негізгі нәтижелері мен қорытындыларының дұрыстығына күмән келтірмейтін қателер анықталған жағдайда, редакция енгізілген өзгерістерді көрсете отырып, тиісті түзетуді жариялауы мүмкін.

Жарияланым этикасын елеулі бұзу фактілері, оның ішінде плагиат, деректерді ойдан құрастыру немесе бұрмалау, зерттеу нәтижелерінің шынайы болмауы, авторлық құқықтарды заңсыз иелену, қайталама жариялау немесе жарияланған жұмыстың дұрыстығы мен ғылыми адалдығына күмән келтіретін өзге де жағдайлар анықталған кезде, редакция мақаланы кері қайтарып алу (ретракциялау) мәселесін қарастырады.

Мақаланы кері қайтарып алу туралы шешім анықталған теріс әрекеттің мән-жайлары қарастырылғаннан кейін, сондай-ақ қажет болған жағдайда авторлардың түсініктемелері алынған соң редакция тарапынан қабылданады. Мақаланы кері қайтарып алу туралы ақпарат пен оның себептері журналдың ресми сайтында жарияланып, бастапқы жарияланыммен өзара байланыстырылып көрсетіледі.